Пратеникот на ВМРО-ДПМНЕ, Бране Петрушевски, на денешната прес-конференција упати остри критики до претседателот на СДСМ, Венко Филипче, обвинувајќи го дека е подготвен да ги исполни бугарските барања во замена за политички поени.
Според Петрушевски, додека Бугарија продолжува да го оспорува македонскиот јазик, историја и идентитет, Филипче ги релативизира ваквите позиции и создава простор за нивно прифаќање. Од владејачката партија посочуваат дека кај новиот лидер на СДСМ се пресликува истата политичка матрица како кај неговиот претходник Зоран Заев, но во уште порадикална форма.
Во партиското соопштение се наведува дека за лидерот на опозицијата нема црвени линии ниту државни интереси кои не би ги ставил на преговарачка маса доколку процени дека така полесно ќе дојде до власт. Пратеникот додаде дека Филипче не ја бара довербата од македонскиот народ, туку од оние структури кои со години вршат притисоци врз Македонија.
ВМРО-ДПМНЕ порача дека заедно со граѓаните нема да дозволи повторување на сценаријата од минатото, потенцирајќи дека на државата и се потребни политичари кои ќе ги заштитат националните обележја.
„Македонија нема потреба од политичари кои бараат власт преку национални отстапки, туку од лидери коишто знаат да кажат „не“ кога се загрозени македонскиот идентитет, јазик, култура и историја“, изјави пратеникот Бране Петрушевски.