Државниот пазарен инспекторат (ДПИ) ќе спроведува засилени и вонредни инспекциски надзори кај трговците низ целата држава поради најавените „Black Friday“ продажни акции.
Како што информираат од Инспекторатот, контролите ќе бидат насочени кон спречување на нечесни трговски практики и обезбедување целосно почитување на законските обврски при нудењето попусти.
Од таму исто така апелираат трговците да обезбедат фер и транспарентни услови за купувачите и строго да се придржуваат до правилата за означување на цени и попусти.
Инспекторатот најавува дека секоја неправилност, обид за доведување во заблуда или измамничко однесување кон потрошувачите ќе биде санкционирано согласно важечките закони.
Воедно, граѓаните се охрабруваат да пријават било какви нерегуларности или сомнителни попусти на телефонот 191 или преку веб-страницата на Инспекторатот – www.dpi.gov.mk.