Комитетот за светско наследство на УНЕСКО, на годишната сесија што се одржува во јужнокорејскиот град Бусан, донесе одлука да го одложи впишувањето на Охридскиот Регион на Листата на светско наследство во опасност.
На државата ѝ е даден дополнителен рок од пет години за спроведување на препораките поврзани со заштитата на природното и културното наследство.
Одлуката ѝ овозможува на Македонија да ги реализира мерките што УНЕСКО со години ги посочува како неопходни за зачувување на статусот на Охридскиот Регион како светско културно и природно наследство.
Препораките на УНЕСКО се однесуваат на спречување на неконтролираната урбанизација и нелегалната градба, подобрување на урбанистичкото планирање, заштита на природните вредности на Охридското Езеро, подобро управување со регионот, зачувување на културното наследство и ограничување на притисокот од туризмот.
Меѓу барањата е и изготвување целосна Стратегија за управување со регионот со јасно дефинирани цели, рокови, одговорни институции и механизми за следење на резултатите.
УНЕСКО во повеќе извештаи предупреди дека кумулативниот ефект од урбанизацијата, инфраструктурните проекти и недоволната контрола може да ја наруши исклучителната универзална вредност поради која Охридскиот Регион беше впишан на листата на светско наследство во 1979/1980 година.
Дел од експертите сметаат дека евентуалното ставање на регионот на Листата на светско наследство во опасност би овозможило дополнителна поддршка, експертиза и механизми од УНЕСКО за надминување на проблемите што доведоа до сегашната состојба.