Цените на нафтата повторно силно пораснаа по новите напади во Ормускиот Теснец и затворањето на саудискиот нафтовод Исток-Запад, што дополнително ги зголеми стравувањата од нарушено снабдување.
Брент утрово поскапе за повеќе од три проценти и ја надмина границата од 108 долари за барел, додека американската WTI нафта се искачи на околу 102 долари.
Дополнителен притисок врз пазарот создаде нападот врз трговски брод во Ормускиот Проток, при што загина еден член на екипажот, а три лица беа повредени.
Саудиска Арабија во меѓувреме го затвори нафтоводот Исток-Запад по напад со дронови, со што привремено е ограничена и главната алтернативна рута за извоз на сурова нафта која го заобиколува Ормускиот Теснец.
Според проценките на аналитичарите, нарушувањата во Ормускиот Проток веќе ја намалиле испораката за околу 1,2 милиони барели дневно, додека протокот на сурова нафта низ теснецот паднал од околу 20 милиони на приближно седум милиони барели дневно.
Новото поскапување дополнително го зголемува ризикот од раст на цените на горивата на светските пазари, особено ако проблемите со транспортот и снабдувањето продолжат и во наредните денови.