Трговскиот суд во Белград денеска донесе одлука за отворање стечајна постапка над АЛТА банка, откако претходно Народната банка на Србија на 30 октомври ѝ ја одзеде дозволата за работа по извршените контролни активности и воведените привремени мерки, соопшти Агенцијата за осигурување на депозити.
Од српската централна банка истакнаа дека овие чекори биле преземени со цел заштита на штедачите и доверителите, како и спречување на можни негативни последици врз целокупната економија и општество.
По одлуката на судот, Народната банка на Србија најави дека во рок од три работни дена ќе објави детални информации за условите, локациите и роковите преку кои ќе се врши исплатата на осигурените депозити.
Од институциите најавуваат дека во наредното известување ќе бидат содржани и сите други клучни информации за клиентите, со цел тие навремено да бидат информирани за натамошната постапка и остварувањето на своите законски права.