Регулаторната комисија за енергетика (РКЕ) денеска треба да ги дефинира новите цени на бензините и дизелот. Ова следува откако Владата на Република Северна Македонија на вонредна седница одлучи да ги продолжи антикризните мерки за горивата, кои ќе останат во сила до 1 јуни.
Целта на продолжувањето на мерките е да се обезбедат постабилни цени на нафтените деривати и да се намали финансискиот товар врз граѓаните и приватниот сектор.
Со оваа одлука, на сила и натаму остануваат намаленото ДДВ за горивата, како и пониските акцизи за бензинот и дизелот. Владините проценки покажуваат дека ваквиот чекор ќе му помогне на домашниот пазар да ја задржи конкурентноста во споредба со земјите од регионот.
Премиерот Христијан Мицкоски изјави дека продолжувањето на мерките има за цел да се задржат пониски цени за граѓаните во услови на нестабилности на светските енергетски пазари.
Новите малопродажни цени на горивата РКЕ ќе ги соопшти во текот на денот, а истите по обичај ќе стапат на сила од полноќ.