Македонското Министерство за надворешни работи (МНР) продолжува со операцијата за извлекување на нашите државјани од земјите зафатени со воените дејствија на Блискиот Исток. За денеска е предвиден третиот по ред лет од Обединетите Арапски Емирати (ОАЕ), кој треба да пренесе нова група македонски граѓани на безбедно во Европа, а потоа и во Скопје.
Од МНР нагласуваат дека се во постојан контакт со сите регистрирани државјани кои побарале помош за евакуација и дека логистичката поддршка преку ОАЕ се покажала како најефикасна рута во моментов.
„За денеска е предвиден трет лет од ОАЕ за евакуација на македонските државјани од погодените земји. Правиме сè што е во наша моќ секој наш граѓанин безбедно да се врати дома“, соопштија од Министерството.
Оваа операција доаѓа во време на ескалација на конфликтот меѓу Израел, Иран и регионалните сили, што го направи комерцијалниот авиосообраќај во регионот речиси невозможен. МНР апелира до сите граѓани кои сè уште се наоѓаат во критичните зони, а не се пријавиле во нашите дипломатско-конзуларни претставништва, тоа да го сторат веднаш.
Досега со претходните два лета беа евакуирани десетици македонски семејства, а со денешниот лет се очекува бројката на безбедно извлечени граѓани значително да се зголеми.