Европа се подготвува за нов период на високи температури, откако над Атлантскиот Океан се создава топлотен бран кој во текот на неделата се очекува да зафати повеќе региони на континентот.
Регионалниот директор на Светската здравствена организација (СЗО) за Европа, д-р Ханс Хенри П. Клуге, предупреди дека се можни екстремни температури во повеќе земји.
Највисоки температури се прогнозираат во Португалија и јужните делови на Шпанија, каде што се очекува термометрите да покажат и до 43 степени Целзиусови. Топлотен удар се најавува и за Франција и земјите од Бенелукс, додека во делови од Централна Азија температурите веќе надминуваат 40 степени.
Поради очекуваните екстремни временски услови, СЗО одржа итен состанок со претставници од 41 земја-членка, Европската комисија и граѓански организации. Главна тема била подготвеноста на државите за справување со топлотните бранови, како и искуствата од претходните периоди со екстремни горештини.
-„Многу луѓе и натаму не препознаваат дека се лично загрозени, дури и кога е прогласен црвен аларм. Во голем број држави недостигаат климатизирани јавни простори, а административните процедури често го одложуваат прогласувањето топлотен бран, што ја забавува реакцијата на здравствените служби“, предупреди Клуге.
Од СЗО потсетуваат дека високите температури претставуваат сериозен ризик, особено за ранливите категории граѓани, и бараат навремени мерки за заштита на населението.
УХМР за во Македонија најави стабилизација на временските услови. Прогнозите најавуваат претежно сончево и топло време, со постепен пораст на дневните температури.