Министерството за надворешни работи и надворешна трговија објави нови информации во врска со македонските државјани на Блискиот Исток. Според официјалните податоци, до овој момент вкупно девет лица побарале асистенција за евакуација од Израел.
Воздушниот простор останува во прекин најмалку до понеделник, што го диктира и планот за извлекување.
„По неговото повторно отворање ќе бидат разгледани можностите и моделите за организирање евентуална евакуација, во согласност со околностите и безбедносната состојба“, соопштуваат од МНР.
За разлика од Израел, во дипломатско-конзуларните претставништва во Доха и Абу Даби до овој момент ниту еден македонски државјанин нема побарано евакуација. Македонските амбасади во регионот остануваат во постојан контакт со граѓаните и се целосно на располагање за помош и координација.