Општина Гази Баба ги додели решенијата за финансиска поддршка на младите лица на возраст од 18 до 25 години кои успешно аплицираа на јавниот повик за субвенционирање на трошоците за полагање возачки испит. Секој од апликантите доби поддршка во висина од 10.000 денари.
Оваа мерка за прв пат се имплементира на територијата на Општина Гази Баба, а градоначалникот Бобан Стефковски истакна дека истата произлегува од изборната програма.
„Оваа мерка за прв пат се реализира во нашата општина и претставува дел од изборната програма и од заложбите кои ги ветивме пред граѓаните. Особено ми е драго што денес уште еднаш покажуваме дека кога ветуваме – работиме посветено за тоа ветеното да стане реалност“, напиша Стефковски на својот официјален профил.
Според локалната самоуправа, целта на проектот е да се олесни процесот за стекнување со возачка дозвола, што се смета за важен чекор кон самостојноста на младата популација.
„Полагањето на возачки испит претставува важен чекор за секој млад човек – поголема самостојност, полесен пристап до образование, работа и нови можности. Токму затоа, како локална самоуправа, решивме директно да помогнеме и да бидеме вистински партнер на младите“, појаснува градоначалникот.
Тој додаде дека Општина Гази Баба во изминатиот период реализирала повеќе проекти за младите, а најави и нови мерки во областа на образованието, спортот и младинските политики во претстојниот период.