Премиерот Христијан Мицкоски оцени дека Македонија имала „историско лето за паметење“ со настапи на голем број светски и домашни музички ѕвезди во повеќе градови низ државата, а тврди дека за организацијата на овие настани не биле потрошени буџетски средства.
Тој ги посочи настапите во Битола, Струмица и Скопје, караванот „Силно светнал ден“, концертот на Хосе Карерас, како и синоќешниот настап на Дејвид Гета на Градскиот стадион, на кој, според Мицкоски, присуствувале околу 50 илјади луѓе.
„Покажавме дека како држава знаеме, можеме и умееме да направиме светско, а тоа да се случува тука во Македонија“, рече Мицкоски, заблагодарувајќи им се на граѓаните и на сите што учествувале во организацијата.
Премиерот се осврна и на критиките и шпекулациите за тоа колку чинеле концертите и останатите манифестации.
„Имам лоша вест за сите оние кои шпекулираа, негодуваа, клеветеа и пласираа лажни информации. Буџетот сите овие настани го чинат нула денари. Слободно можете да проверите во ‘Отворени финансии’“, изјави Мицкоски.
Според него, сите настани биле организирани со поддршка на општествено одговорни компании, без трошење државни пари.
„Потрошени се нула денари буџетски средства за организација на сите овие настани, а сепак имавме незаборавно лето“, додаде премиерот.