Премиерот Христијан Мицкоски оцени дека првичните разговори во рамки на коалицијата за реконструкција на Владата се конструктивни и најави дека неделава тие ќе продолжат, а очекува во текот на викендот и да завршат.
Ваквата изјава претседателот на Владата ја даде во одговор на новинарско прашање по учеството на Годишниот состанок на Управниот одбор на Центарот за извонредност во финансиите – ЦЕФ (2026 Annual Meeting of the CEF Governing Board).
Во првите разговори преовладува конструктивен амбиент. Во текот на оваа недела повторно ќе имаме средби, јас очекувам тоа да бидат завршни, а во текот на викендот да се формализира сето тоа и со имиња, и со останати специфики, потенцира Мицкоски.
Шефот на извршната власт дополнително појасни дека коалициските партнери на маса ги ставиле сите опции за кадровско и функционално подобрување на кабинетот. Во рамки на досегашните разговори, како што додаде тој, станало збор и за опција за промена на одредени ресори.