Премиерот Христијан Мицкоски денеска ќе учествува на Самитот Европска Унија – Западен Балкан, што се одржува во Тиват, Црна Гора, во присуство на лидери од регионот и високи претставници на Европската Унија.
Според најавите од Владата, на Самитот ќе се разговара за европската интеграција на земјите од Западен Балкан, регионалната соработка и заедничките предизвици поврзани со економскиот развој, инфраструктурното поврзување и стабилноста на регионот.
Со Самитот ќе копретседава претседателот на Европскиот совет, Антонио Кошта, кој во пресрет на средбата реализираше турнеја низ земјите од Западен Балкан, вклучително и посета на Скопје.
Главна тема на собирот е „Заедничкиот просперитет и стабилност на Европската Унија и Западен Балкан“, а по завршувањето на разговорите е предвидена заедничка прес-конференција на лидерите.
На средбата во Скопје оваа недела, Мицкоски повтори дека земјава останува посветена на европскиот пат и спроведувањето на реформите, додека Кошта порача дека напредокот во евроинтегративниот процес останува поврзан со исполнувањето на преземените обврски и продолжувањето на реформите.