Премиерот Христијан Мицкоски денеска упати отворена покана до бугарскиот колега Румен Радев да ја посети земјава. Одговарајќи на новинарски прашања по отворањето на „Спортските игри за млади“, Мицкоски истакна дека е подготвен за дијалог на премиерско ниво.
„Не гледам причина зошто да не го поканам. Ако ова е поканата вака еве го поканувам“, изјави Мицкоски.
Во однос на очекувањата од новата бугарска влада, премиерот нагласи дека не очекува подобрување на односите сè додека опозицијата дома, според него, работи против националните интереси.
„Се додека има котиња од СДСМ, кои што коленичат и кои што ги распродаваат македонските национални интереси, не очекувам подобрување, наместо да застанат со нас и да се борат за македонските национални интереси, овие котиња одлучија за жолтици да коленичат таму“, истакна тој.
Мицкоски додаде дека веќе му честитал на Радев за изборниот резултат и изрази надеж дека со новата влада во Софија ќе може да се разговара за суштинските теми.
Премиерот се осврна и на заканите од Бујар Османи во врска со законот за правична застапеност, оценувајќи ги како разоткривање на вистинските намери, додека за цената на горивата најави добри вести за граѓаните.
„Според она што гледа изминатите два до три дена, очекувам в понеделник да имаме поевтинување“, заклучи Мицкоски.