Информациите што ги пласираа СДСМ и Венко Филипче дека Алта банка имала забрана за работа во Европската Унија при нејзиниот влез во Македонија се целосна невистина, истакна портпаролот на ВМРО-ДПМНЕ, Валентин Манасиевски, на денешната прес-конференција.
Според Манасиевски, вистината е дека во август 2024 година регулирачите во Австрија утврдиле прекршок за ненавремено пријавување на стекнат удел над 10% во „Адико банка“ од страна на „Алта пеј“ и „Дипломат пеј“, поради што им биле суспендирани гласачките права. Откако во декември 2024 година „Дипломат пеј“ ги продала своите акции на австриски инвеститор, во февруари 2025 година суспензијата за „Алта пеј“ била укината бидејќи повеќе немало заедничко дејствување.
„Банка којашто би имала забрана за работа од ЕУ, нема можност да влезе во Македонија. Затоа, во Македонија, немало никаква можност да биде забранет влез на Алта банка“, нагласи Манасиевски.
Од владејачката партија порачуваат дека станува збор за прекршочна казна од австриските регулатори за административен пропуст, обвинувајќи ја опозицијата за постојано ширење невистини за различни прашања пред јавноста.