Премиерот Христијан Мицкоски денеска присуствуваше на пуштањето во употреба на новата детска градинка „Лавче“ во населеното место Инџиково, истакнувајќи дека секој завршен проект носе повеќе среќа и радост за најмилите.
„Добар ден и од мене. Уште еден ден, уште еден завршен проект, уште еден навистина прекрасен проект – детска градинка. Кога се пушта во употреба ваков проект, тоа значи дека има повеќе среќа, повеќе радост, повеќе убави моменти, пред сè за најмилите, за дечињата, и нема како човек да ја скрие емоцијата, бидејќи ова се навистина за мене прекрасни моменти“, изјави Мицкоски.
Тој се заблагодари на министерот, градоначалникот, пратениците, советниците, вработените во Општина Гази Баба и владините колеги за реализацијата на проектите започнати уште при формирањето на Владата во јуни 2024 година, додавајќи дека тие сега добиваат своја смисла и веќе ги имаат првите корисници.
„Продолжуваме во оваа насока и во иднина и продолжуваме да испорачуваме проекти. Има уште многу проекти во периодот којшто следи, којшто ќе финишираат, ќе бидат завршени, ќе бидат пуштени во употреба, така да што, еве, ве повикувам вас, медиумите, да го проследиме сето она коешто значи како Македонија се гради. Ви благодарам“, порача премиерот.