Предлогот на СДС и Венко Филипче за минимална плата од 600 евра е крајно несериозен, популистички и без никакви претходни факти и аргументи, изјави Манасиевски од ВМРО-ДПМНЕ, одговарајќи на новинарско прашање за иницијативата на опозицијата.
Според Манасиевски, настапот на Филипче бил доказ за неспремност, бидејќи законот не бил технички подготвен, ниту пак имало пресметки за буџетските импликации. Тој обвини дека зад барањата на Сојузот на синдикати на Македонија (ССМ) всушност стојат СДС и Левица.
„Имаа 7 години време минималната плата да ја искачат до 600 евра. Тоа не го направија, но затоа ги наполнија своите џебови“, истакна Манасиевски.
Тој упати и директно прашање поврзано со бизнисите на семејството на поранешниот премиер: „Еве прашуваме до јавноста, колку работници во фирмите на Заеви земаат минимална плата? Според нашите сознанија и информации со кои располагаме, вработените во фирмите на Заеви земаат плата во вид на минимална“, рече Манасиевски, посочувајќи на лицемерието на опозицијата.