Македонски државјанин е уапсен во Србија по тешка сообраќајна несреќа во која со камион удрил во возач на итна медицинска помош од Врање.
Полициската управа во Лесковац го потврди случајот и соопшти дека на македонскиот возач му е одреден притвор во траење од 48 часа.
Несреќата се случила за време на транспорт на болно дете од Врање кон Универзитетскиот клинички центар во Ниш.
Возилото на Итната помош морало да запре поради дефект на електричната инсталација.
Возачот на амбулантното возило, роден 1985 година, излегол од возилото за да ја провери состојбата и да обезбеди сигурност за пациентот, кога во него удрил товарниот камион.
Повредениот возач е приклучен на апарати за вештачко дишење и се наоѓа во стабилна, но критична состојба на Клиниката за анестезија во Ниш, каде бил префрлен по првичниот третман во Лесковац.
Детето било веднаш преземено од друг лекар кој се нашол на местото на настанот и транспортот до Ниш успешно завршил.
Српските надлежни органи продолжуваат со истрагата за целосно утврдување на сите околности под кои се случила сообраќајната несреќа.