Премиерот Христијан Мицкоски најави изградба на национален дата-центар кој треба да ги поврзе државните институции во единствен систем и да обезбеди повисоко ниво на сајбер-заштита на податоците.
Во изјава дадена во Берово, Мицкоски рече дека државата веќе располага со секундарен, односно recovery дата-центар во Прилеп, но дека во рамките на реформската агенда со Европската Унија е предвиден и нов примарен национален дата-центар.
Според премиерот, проектот ќе биде поддржан со европски грант и поволен заем, а преку системот на интероперабилност треба да ги поврзе институциите и нивните податоци на едно место.
„Сега секоја институција од сајбер-напади се брани како знае и умее“, рече Мицкоски, додавајќи дека со новиот систем би се воспоставила централизирана заштита за институциите.
Планот, како што објасни, е примарниот дата-центар да биде поврзан со постојниот секундарен центар во Прилеп, кој би служел како резервно решение во случај на дефект или пад на системот.
Како трето ниво на заштита, Владата планира и национален cloud-систем во кој би се чувале резервни копии од податоците на институциите што ќе бидат поврзани во системот.
Мицкоски оцени дека со ваквата инфраструктура државата треба да ја зголеми отпорноста на сајбер-напади и да обезбеди поголема сигурност за државните податоци и дигиталните услуги.
Во продолжение на изјавата тој повторно ја нападна опозицијата, тврдејќи дека е против дата-центри, рудници, хидроцентрали, автопати и инвестиции.
„Тие се во суштина против Македонија. Денес опозицијата е против Македонија и тоа е единственото логично објаснување“, изјави Мицкоски.