Опозицискиот СДСМ упати јавен повик до Владата за распишување референдум на кој граѓаните сами ќе одлучуваат за насоката во која ќе се движи државата. Портпаролката и членка на Извршниот одбор на партијата, Богданка Кузеска, на денешната прес-конференција ја обвини извршната власт дека нема средства за гласање, но има за други намени.
Според СДСМ, актуелните економски и политички состојби директно се одразуваат врз животниот стандард на граѓаните и егзодусот на младите.
„Владата на Мицкоски призна дека нема пари ниту за организирање референдум на кој граѓаните треба сами да одлучат за својата иднина. Пари има само за криминалната група на ВМРО и нивните криминални тендери. Нема пари за граѓаните, нема за повисоки плати, нема за минимална плата од 600 евра, нема пари за мерки, нема пари за субвенции за земјоделците“, изјави Кузеска.
Таа додаде дека по две години од доаѓањето на ВМРО на власт, состојбите со платите и цените во земјава се алармантни, обвинувајќи ја власта за лажни ветувања поврзани со договорите и евроинтеграциите.
„Мицкоски и ВМРО лажеа за сè а лажат и денеска. Лажеа дека ќе „го вратат името“ лажеа дека Преспанскиот договор е предавство, лажеа дека се загрозени јазикот, културата и македонскиот идентитет. Сега повторно лажат – дека Европа го загрозува македонскиот идентитет. Не. Единственото што е навистина загрозено е иднината на нашите деца со криминалните политики на Мицкоски“, подвлече портпаролката на опозицијата.
Кузеска во своето обраќање даде и личен осврт на состојбите со заминувањето на младите луѓе од државата и потенцираше дека референдумското изјаснување е неопходно.
„Референдумот не е политичко прашање туку прашање за нашите семејства, за нашите деца и за иднината на Македонија. Граѓаните сами треба одлучат дали се подготвени тие, нивните семејства и нивните деца да ја плаќаат цената на погрешните политики на Мицкоски. Ние не сакаме да плаќаме цена. Ние сакаме иднина, европска. Распишете референдум! Граѓаните нека одлучат!“, порача Кузеска.