Кралот на Велика Британија, Чарлс Трети, донесе одлука да му ги одземе сите благороднички титули и почесни одликувања на својот брат, принцот Ендру, како и да го исели од резиденцијата Ројал Лоџ, соопшти денеска Бакингемската палата.
Во официјалното соопштение се наведува дека принцот формално добил барање да го предаде закупот на вилата, а ќе биде преместен во друга приватна резиденција. Одлуката, како што се истакнува, е донесена поради неговиот контроверзен однос со починатиот американски сексуален престапник Џефри Епстин.
Принцот Ендру, кој е осми во редот за британскиот престол, повторно е под притисок на јавноста поради новите обвинувања изнесени во посмртните мемоари на Вирџинија Џуфре, една од жртвите на Епстин, која тврди дека била жртва на сексуален напад.
Иако Ендру ги негира сите обвиненија, на почетокот на месецот се откажа од титулата Војвода од Јорк и од одликувањето Ред на витези, што дополнително ги засили шпекулациите дека кралското семејство се дистанцира од него.