Новиот систем за влез и излез во Европската Унија ќе биде удар за викенд туристите од Македонија кои патуваат во Грција, оценува Аркан Керим, претседател на Туристичко-угостителската комора при ССК.
Во дебата на ТВ Телма, Керим рече дека првичните најави биле дека патниците еднаш ќе се фотографираат, а потоа на граница ќе се евидентираат само со отпечаток. Но, според него, практиката покажува дека постапката не оди така брзо.
Тој проценува дека околу 250.000 туристи, кои најчесто одат во Грција за викенд, од четврток до недела или од петок до понеделник, ќе бидат најмногу погодени од новиот систем. За разлика од нив, граѓаните кои имаат свои станови, куќи или приколки во Грција, според Керим, ќе продолжат да патуваат и покрај можните чекања.
Керим смета дека ова може да биде шанса за домашниот туризам, доколку македонските туристички центри понудат атрактивни пакети.
„Наместо да чекаат со часови на граница, граѓаните можат да уживаат во Охрид, Струга, Дојран, Преспа, Битола и другите наши туристички места“, рече Керим.
Тој очекува дека и Грција ќе почувствува економски последици од системот, бидејќи, како што посочи, околу 1,2 милиони македонски граѓани годишно ја посетуваат земјата.