Комесарката за проширување на Европската Унија, Марта Кос, на Форумот за проширување во Брисел изјави дека ЕУ е целосно подготвена да ја интегрира Црна Гора дури и без значајни внатрешни реформи. Таа посочи дека земјата е мала по обем – „една третина од големината на Виена, големината на Тулуз или Штутгарт“ – и затоа нејзиното членство нема да претставува оптоварување за Унијата. Кос потсети и дека во 2004 година Унијата успешно интегрирала 70 милиони нови жители.
Сепак, таа нагласи дека во пристапниот процес нема да има „кратки патишта“ и дека Брисел нема да прави компромиси со европските стандарди и неопходните реформи. Според неа, ЕУ треба цврсто да ги поддржува најнапредните кандидати, меѓу кои Црна Гора традиционално се смета за најподготвена.
Црногорскиот премиер Милојко Спајиќ оцени дека моментот е идеален за проширување на ЕУ. За телевизијата Н1 тој изјави дека Владата на Црна Гора е „многу задоволна“ од забрзувањето на европскиот процес и ќе се обиде максимално да го искористи. Спајиќ додаде дека брзиот напредок нема да влијае на квалитетот на реформите: „Сакаме да ги затвориме сите поглавја од преговорите во рекордно време, но ова нема да биде преседан – и другите сегашни земји-членки го направија тоа“.