Со изведување на материјални докази од Обвинителството денеска во судницата во „Идризово“ треба да продолжи судењето за пожарот во кочанската дискотека „Пулс“, во кој загинаа 63 лица, а над 200 беа повредени.
На претходното рочиште беа презентирани материјални докази на Обвинителството, меѓу кои видео-снимки и фотографии поврзани со објектот – клубот „Пулс“, како од критичната вечер, така и од периодот додека објектот функционирал.
Досега на судењето беа сослушани сведоци предложени од Обвинителството, а беа изведени и обдукциски наоди и мислења од Институтот за судска медицина за причините за смртта на жртвите, како и медицинска документација за повредените. Претходно беше сослушан и директорот на Институтот за судска медицина, Александар Станков.
Пожарот во дискотеката „Пулс“ во Кочани избувна на 16 март 2025 година за време на настап на групата ДНК и претставува една од најтешките трагедии во поновата историја на земјата. Судењето го води судијката Дијана Груевска-Илиевска, а обвинението го застапува тим од 15 јавни обвинители.