Ќе се бара нов газда за Алта Банка

 Тројца администратори назначени од Народната банка го преземаат управувањето со „Алта банка“ Битола во наредните три месеци, поради околности што можат сериозно да ја загрозат нејзината солвентност. Тие имаат рок од 21 ден да ја утврдат финансиската состојба на банката и да достават извештај до Народната банка. Во меѓувреме, остануваат ограничувањата за клиентите – граѓаните неделно можат да повлекуваат или да трошат со картички најмногу 10.000 денари, додека фирмите не можат да префрлаат пари надвор од банката. Гувернерот Трајко Славески изјави дека сопственикот од Белград е известен да ги продаде акциите, а доколку тоа не го направи, Народната банка ќе ги понуди на аукција. Од централната банка уверуваат дека „Алта банка“ продолжува со работа, а депозитите на граѓаните се осигурени до 30.000 евра.