Украинскиот министер за надворешни работи Андриј Сибиха денеска изјави дека Русија систематски ги таргетира американските компании што работат во Украина, откако во руски напад беше погоден објект на американскиот земјоделски производител „Банџ“ во градот Днипро, во југоисточниот дел на земјата.
„Овој напад не беше грешка – беше намерен, бидејќи Русите се обидоа неколкупати да го погодат ова претпријатие“, напиша Сибиха на социјалната мрежа Икс.
Тој оцени дека Русија систематски го напаѓа американскиот бизнис во Украина и додаде дека ваквите дејствија го покажуваат „целосното непочитување на рускиот претседател Владимир Путин кон мировните напори за Украина, предводени од САД“.
Претходно денеска, градоначалникот на Днипро, Борис Филатов, соопшти дека во руски напад со дронови било погодено претпријатие на компанијата „Банџ“.