Заменик-претседателката на СДСМ, Фани Каранфилова Пановска, денеска во Горни Подлог, Кочанско, учествуваше на манифестацијата „Денови на кочански ориз“, каде се сретна со оризопроизводителите и граѓаните од овој крај.
Во изјава за медимите таа предупреди дека без итна финансиска поддршка, оризопроизводителите може да не бидат во можност да ги посеат нивите догодина, посочувајќи дека актуелната откупна цена не ги покрива производствените трошоци, а дополнителен проблем е и отсуството на откуп.
„Од разговорите со сите оризопроизводители можеме да кажеме дека состојбата е катастрофална. Тие искажуваат сериозно незадоволство и загриженост бидејќи не можат да ги покријат производствените трошоци. Денеска нема откуп на оризот, а тој ориз што се откупува, го откупуваат по 16 денари. Таа цена за еден килограм ориз е страшно понижувачка“, рече Каранфилова Пановска.
Таа посочи дека производителите се соочуваат со сериозен пораст на трошоците за производство.
„Само во 2021 година, во време на Социјалдемократскиот сојуз, откупната цена на оризот беше 42 денари. Денеска, кога земјоделците, оризопроизводителите, се соочени со сериозен пораст на цената на нафтата, на ѓубривата, на целата механизација, оваа цена апсолутно не ги покрива трошоците. Тоа што нема откуп е дополнително загрижувачки“, потенцираше Каранфилова Пановска.
Заменик-претседателката посочи дека СДСМ минатата недела во Собранието поднесе законско решение за поддршка на земјоделците и оризопроизводителите во овој период на криза.
„Понудивме конкретно за оризот 10 денари од килограм произведен и откупен ориз, дополнителна финансиска поддршка за сите оризопроизводители, за да успеат да соберат некои средства со кои што ќе може да ја покријат следната сеидба.
Во спротивно, ќе се соочиме со тоа оризопроизводителите да не може да ги посеат нивите во следната година. Ги повикуваме владејачкото мнозинство, ВМРО и целата владина коалиција сериозно да го разгледаат и да го поддржат ова законско решение и со најавениот ребаланс до крајот на годината да ги обезбедат овие средства, за да можеме да сметаме дека догодина во Македонија ќе има земјоделие, ќе има оризопроизводители“, порача Каранфилова Пановска.