Основниот суд донесе ослободителна пресуда за Борче Ангелов и Илија Спасески, кои беа обвинети за физичкиот напад врз Христијан Пендиков, поранешен секретар на бугарскиот клуб во Охрид. Инцидентот што се случи на 19 јануари 2023 година пред угостителски објект на Кејот на Охридското Езеро тогаш предизвика големи политички и меѓународни реакции меѓу Македонија и Бугарија, а Пендиков по нападот беше транспортиран со владин авион на лекување во Софија, каде што подоцна доби и бугарско државјанство.
Одлуката на судот следува откако Апелациониот суд во Битола го врати предметот на повторно судење. Судот оцени дека во текот на постапката не е докажано оти двајцата обвинети го сториле кривичното дело што им се става на товар, како и дека не може да се докаже присуство на етнички мотив за нападот.
Адвокатот Цобоски истакна дека со оваа одлука правдата е задоволена и дека судот постапил сосема исправно од правен аспект, врз основа на сите изведени докази и дадени укажаувања од страна на битолска Апелација.
Од друга страна, адвокатот на оштетениот Пендиков, Камишевски, посочи дека понатамошниот тек на предметот сега зависи од Јавното обвинителство, од кое се очекува да поднесе жалба до повисокиот суд.