СДСМ бара дополнителна финансиска поддршка од 10 денари за килограм произведен и откупен ориз и поддршка од владејачкото мнозинство за предложеното законско решение, изјави заменик-претседателката на СДСМ, Фани Каранфилова Пановска денеска од Горни Подлог, Кочанско.
„Од разговорите со сите оризопроизводители, состојбата е катастрофална. Искажуваат сериозно незадоволство и загриженост за тоа што не можат да си ги покријат производствените трошоци. Денеска нема откуп на оризот“, изјави Каранфилова Пановска.
Таа нагласи дека ниската откупна цена и зголемените производствени трошоци го доведуваат во прашање продолжувањето на производството.
„Тој ориз што го откупуваат, го откупуваат по 16 денари, таа цена за 1 килограм ориз е страшно понижувачка. Само во 2021 година, во времето на Социјалдемократскиот сојуз, откупната цена на оризот, кога го откупуваа, беше 42 денари. Денеска, кога земјоделците, оризопроизводителите, се соочени со сериозен пораст на цената на нафтата, на ѓубривата, на целата механизација, оваа цена апсолутно не ги покрива трошоците“, рече таа.
Каранфилова Пановска посочи дека СДСМ веќе предложи конкретна законска мерка за помош на оризопроизводителите.
„Тоа што нема откуп е дополнително загрижувачки. И затоа ние уште минатата недела во Собранието поднесовме закон за да ги заштитиме земјоделците и оризопроизводителите во овој период на криза. И понудивме конкретно за оризот по 10 денари од килограм произведен и откупен ориз. Дополнителна финансиска поддршка за сите оризопроизводители за да успеат да соберат некои средства со кои што ќе може да ја покријат следната сеидба“, нагласи Каранфилова Пановска.
Таа предупреди на последиците доколку изостане поддршката и ја повика власта да ги обезбеди потребните средства со најавениот ребаланс.
„Во спротивно, ќе се соочиме со тоа да оризопроизводителите нема да може да ги посејат нивите во следната година. Ги повикуваме од владејачкото мнозинство, од ВМРО, Христијан Мицкоски и целата владина коалиција сериозно да го разгледаат и да го поддржат ова законско решение и со најавениот ребаланс до крајот на годината да ги обезбедат овие средства за да можеме да сметаме дека догодина во Македонија ќе има земјоделие, ќе има оризопроизводители и ќе имаме храна“, порача Каранфилова Пановска.