Во Музејот на македонската борба за самостојност утре, со почеток во 10 часот, ќе се одржи петтата Глобална женска лидерска конференција „Јас сум жена“, организирана од истоименото здружение во рамките на иницијативата „Мајките за Македонија“.
Настанот ќе собере жени со различни професионални искуства, кои ќе имаат можност да споделат лични приказни, знаења и искуства, но и да воспостават нови контакти и соработки.
Меѓу говорниците ќе бидат и градоначалничките на Кисела Вода и Неготино, Бети Стаменкоска-Трајкоска и Марија Нацева. Тие ќе зборуваат за предизвиците со кои се соочуваат жените на високи јавни функции, одговорноста во работењето и грижата за заедницата и идните генерации.
Организаторите велат дека интересот за конференцијата ја потврдува потребата од поврзување, размена на искуства и отворање нови можности за жените.
Влезот е бесплатен, но заинтересираните треба претходно да се регистрираат.