Пилот-проектот на грчките власти за воведување паметни камери со вештачка интелигенција покажа фрапантни резултати на патиштата во Атина. За само четири дена, системот евидентирал повеќе од 2.000 сериозни сообраќајни прекршоци на локации со висок ризик.
Најголем дел од прекршоците се регистрирани на авенијата Сингро, каде една камера открила над 1.000 возачи кои користеле мобилни телефони или не носеле безбедносни појаси. Дополнително, евидентирани се 800 случаи на пребрзо возење и 480 поминувања на црвено светло.
Министерот за дигитално управување, Димитрис Папастергиу, истакна дека целта на оваа мерка е спасување животи, а не само казнување:
„Сакаме граѓаните да знаат дека правилата важат за сите и се спроведуваат на фер и современ начин“, изјави Папастергиу.