Градоначалникот на Град Скопје, Орце Ѓорѓиевски, денеска го означи почетокот на големата еко-акција „GENERALKA WEEKEND“. Манифестацијата, која се смета за најмасовна на Балканот, годинава мобилизира десетици илјади волонтери од 80 општини и над 250 државни институции.
На настанот присуствуваа претседателката Гордана Силјановска-Давкова, госпоѓа Рози Мицкоска, амбасадорот на Австрија Мартин Памер, министерот за животна средина Муамер Хоџа и заменичката Ане Лашкоска.
„Денешниот настан е силна порака. Порака дека чистата животна средина е заедничка одговорност, дека секој од нас има улога во изгледот на својата улица, своето маало, својот град и својата држава“, истакна Ѓорѓиевски.
Тој посочи дека акцијата се спроведува на 500 локации ширум Македонија. Градоначалникот нагласи дека хигиената во главниот град е приоритет и дека екипите работат во три смени за одржување на јавниот простор.
„Колку и да работат институциите, градот не може да биде чист ако сите заедно не го чуваме. Затоа во наредните денови започнуваме и кампања за подигнување на јавната свест за одржување чиста животна средина“, порача тој, најавувајќи засилени инспекциски контроли на терен.