Претседателот на Собранието, Африм Гаши, денеска оствари работна средба со заменик-амбасадорката на САД, Никол Варнс. На средбата беше истакнато дека законодавниот дом дејствува ефикасно во насока на исполнување на Реформската агенда и зајакнување на партнерството со Соединетите Американски Држави.
Гаши ја информирал Варнс за тековните ангажмани на Собранието поврзани со приоритетите за пристапување во Европската Унија. Тој нагласил дека фокусот останува на демократските стандарди и квалитетната дебата при донесувањето на новите законски решенија.
Клучен дел од разговорот бил посветен на модернизацијата на институцијата преку дигитализација, што според соговорниците е предуслов за поголема транспарентност и безбедност. Исто така, станало збор и за улогата на парламентарната дипломатија.
„Претседателот Гаши изрази искрена благодарност за континуираната американска поддршка, потврдувајќи уште еднаш колку е важно стратешкото партнерство со САД. Од своја страна, Варнс ги оцени неговите напори за градење мостови на разбирање меѓу политичките субјекти и различните заедници во земјата“, се вели во собраниското соопштение.
Двете страни ја потврдиле својата посветеност за понатамошна соработка во насока на зајакнување на меритократијата и функционалноста на институциите, како темелни вредности за демократскиот развој на земјата.