Фондот за здравствено осигурување информира дека интензивно се работи на надминување на проблемот со здравственото осигурување на вработените во Министерството за внатрешни работи, појаснувајќи дека статусот на осигурениците се утврдува автоматски, врз основа на податоците за пријавите и уплатените придонеси што електронски ги презема од Управата за јавни приходи.
Од Фондот нагласуваат дека не вршат рачно исклучување на осигурениците, ниту носат поединечни одлуки за прекинување на осигурувањето. Станува збор за автоматизиран систем кој подеднакво се применува за сите правни субјекти, вклучително и за државните институции.
Причината за актуелната состојба, како што објаснуваат, е дополнителното пријавување вработени за претходен период врз основа на судски одлуки, поради што е потребно усогласување на пресметките и уплатата на придонесите.
Од ФЗО информираат дека на нивна иницијатива е формирана меѓуинституционална работна група со претставници на надлежните институции, а досега се одржани неколку работни состаноци на кои се разгледуваат можните решенија.
Од Фондот посочуваат дека со слична состојба во минатото се соочил и самиот Фонд, поради што нагласуваат дека не станува збор за постапка насочена конкретно кон МВР или кон одредена категорија вработени.
„Свесни сме дека ваквите состојби предизвикуваат оправдана загриженост кај вработените и нивните семејства. Затоа, нашата заложба е насочена не само кон решавање на моменталниот проблем, туку и кон воспоставување долгорочен механизам што ќе обезбеди поголема сигурност и континуитет во остварувањето на правата од здравственото осигурување“, наведуваат од ФЗО.
Оттаму очекуваат соработката меѓу надлежните институции во најкраток рок да резултира со конкретно и трајно решение, а јавноста ќе биде информирана за понатамошните активности.

