Членот на Извршниот одбор на СДСМ, Јон Фрчкоски, на денешната прес-конференција упати сериозни обвинувања за организиран криминал и системска корупција до власта. Тој презентираше детали за нова корупциска шема преку која, како што тврди, милионски суми од буџетот се прелеваат кај фирми блиски до владејачката партија.
„Додека владата нема пари за повисоки плати, нема пари за пензии ниту за мерки за граѓаните во криза фрчат тендери со милионски суми за едни исти фирми блиски до ВМРО-ОКГ. Шемата е добро позната и разработена. Ова е корупциски систем во кој едни исти фирми добиваат сè. На локално ниво. На централно ниво. Во институциите, општините, сите раководени од кадри на ВМРО-ОКГ… Денеска АКТ на СДСМ открива нов скандал. Нова омилена фирма на ВМРО-ОКГ. Фирмата МАСТЕФ ДООЕЛ, блиска до власта, добила дури 93 тендери. Вкупната вредност? Над 18,3 милиони евра. Народни пари.“
На прес-конференцијата беше посочено дека најголемиот дел од овие средства се реализирани на територијата на Скопје, вклучувајќи ги и градежните активности за забавниот парк во главниот град, додека во исто време градот се соочува со сериозни комунални проблеми.
„Најголеми суми се реализирани во Скопје, каде е и letzten тендер за Луна парк, истата фирма. Кога Орце ветуваше чистење на градот очигледно мислел на џебовите на граѓаните, бидејќи ѓубрето стои. Пари се чистат на големо. Државата тоне во долгови. Граѓаните едвај преживуваат. Скопје е во хаос. А власта дели милиони на омилените фирми… Ете затоа во Македонија нема реформи, нема европско обвинителство, нема ЕУ. Заради лапање пари, заради криминал, заради тендери.“
Фрчкоски упати остри критики до правосудните органи за нивната пасивност и најави дека опозицијата преку својот тим АКТ ќе продолжи јавно да ги објавува сите сомнежи за финансиски злоупотреби.
„Прашањето е: До кога Јавното обвинителство ќе молчи? Или чека обвинителот насоки по телефон од премиерот Мицкоски? Колку скандали треба да објави АКТ на СДСМ за лично институциите да почнат да работат? СДСМ нема да молчи. Ќе продолжиме да ги разобличуваме сите криминални шеми на ВМРО-ОКГ. Секој тендер. Секоја фирма. Секој милион народни пари. Доаѓа време на одговорност, правда и вистина.“