СДСМ денеска преку прес-конференција на портпаролката Богданка Кузеска изнесе нови тврдења во врска со рудникот за антимон во Крива Паланка. Од партијата тврдат дека зад концесијата за локалитетот „Луке“ стојат донатори на владејачката партија, отфрлајќи ги владините најави дека се работи за стратешки интерес.
Според СДСМ, официјалните податоци од Министерството за енергетика укажуваат дека концесионер на локалитетот е компанијата „РИ Енергетика Пела ДОО Скопје“. Од партијата посочуваат дека сопственик на оваа фирма е Ѓорѓе Качурков, за кого тврдат дека е донатор на ВМРО-ДПМНЕ.
Кузеска во своето обраќање го спомена и потпишувањето на договорот во Вашингтон, поврзувајќи го со претходни концесии.
„Договорот во Вашингтон го потпиша Ник Јовановски од австралиската „Пела глобал лимитед“. Истиот тој Николче Јовановски кој уште во 2015 година, како застапник на фирмата на донаторот на ВМРО-ДПМНЕ, го потпишал договорот за концесија за локалитетот Луке“, изјави Кузеска.
Од СДСМ порачуваат дека овој случај е „класична партиска концесија“ и најавуваат дека здравјето на граѓаните мора да биде приоритет. Поради ова, партијата побара одржување референдум во Крива Паланка, каде што граѓаните директно би се изјасниле за проектот.
