Голема полициска акција во Куманово поради сомневања за организиран криминал, изнуда и перење пари. Полициски службеници од Одделот за сузбивање на организиран и сериозен криминал од утрово вршат претреси на повеќе локации, а според неофицијалните информации, цел на истрагата е криминална група која подолг период се занимавала со лихварство, изнуда и перење пари.
Од Јавното обвинителство потврдија дека акцијата се спроведува по наредба на надлежен јавен обвинител, кој ги координира полициските активности.
„Врз основа на наредби обезбедени од надлежното јавно обвинителство се вршат повеќе претреси за обезбедување докази во врска со кривични дела изнуда, перење пари и други приноси од казниво дело и несовесно работење во службата“, информираат од Обвинителството.
Според неофицијалните информации осомничената група наводно користела закани, насилство и уцени за да изнудува пари и да стекнува противправна имотна корист. За организатор се сомничи лице познато под прекарот Штука, а во рамките на акцијата се проверуваат и нотарска канцеларија и менувачница, поради можна поврзаност со сомнителните финансиски активности.
Неофицијално, при досегашните претреси биле пронајдени пари, возила и документација што би можеле да бидат значајни за истрагата.
Акцијата сè уште трае, а засега нема официјални информации за бројот на осомничени, евентуално приведени лица и вредноста на пронајдените пари и други предмети. Од Обвинителството најавуваат повеќе детали по завршувањето на полициските активности.