Градските власти и јавните претпријатија започнаа координирани активности за уредување на патната инфраструктура, јавното зеленило и пешачките зони низ Скопје. Како што информираше градоначалникот Орце Ѓорѓиевски, покрај големите капитални проекти, со еднакво внимание се работи на деталите кои значат поголем ред, безбедност и урбана култура во главниот град.
На терен веќе интензивно се врши обележување на хоризонталната сигнализација, а паралелно се спроведува и замена на дотраената вертикална сигнализација низ градските сообраќајници. Според неговите најави, јасната и функционална сигнализација е клучна за побезбеден сообраќај и поголема сигурност за сите учесници во него.
Со цел да се спречи узурпацијата на јавниот простор, долж булеварите се поставуваат заштитни столпчиња кои треба да ги обезбедат пешачките и велосипедските патеки од непрописно паркирање автомобили.
Паралелно со инфраструктурните активности, се уредува и зеленилото кое е во надлежност на Град Скопје, со фокус на чистење на парковите и булеварите. Екипите континуирано работат и на чистење на коритото на реката Вардар на територијата на градот.
Дополнително, во рамки на овие активности, во тек е уредување на пешачките зони во Зоолошката градина во Скопје, а јавните претпријатија работат со полн капацитет со цел граѓаните да добијат чист, уреден и безбеден град.