Германската полиција трага по 35-годишен државјанин на Србија кој во неделата рано наутро побегнал од затвор во Дуизбург, во сојузната покраина Северна Рајна-Вестфалија.
Според германските медиуми, затвореникот околу 3:30 часот ги пресекол решетките на прозорецот од ќелијата на третиот кат, се искачил на четвртиот кат, а потоа преку покривот успеал да излезе од затворот.
Во неговата ќелија било пронајдено скриено место во подот, за кое надлежните се сомневаат дека го користел за чување на алатот со кој ги пресекол челичните решетки.
Министерството за правда на Северна Рајна-Вестфалија започнало истрага за околностите под кои било овозможено бегството и за тоа како затвореникот дошол до потребниот алат.
Бегалецот бил во притвор од почетокот на февруари поради сомнение за тешка кражба. Претходно бил осуден на шест години затвор за провали во станови, но пресудата сè уште не е правосилна. Бил прогласен за виновен за кражба на вреден накит и околу 200.000 евра во готовина.
Полицијата продолжува со потрагата по него.