Претседателот на СДСМ, Венко Филипче, преку видео-обраќање упати повик за национална мобилизација и граѓански отпор, обвинувајќи ја Владата предводена од Христијан Мицкоски дека планира да ги стави ресурсите за вода и електрична енергија во функција на бизнис-интереси преку изградба на дата-центри.
Тој посочи дека денеска во Пехчево имало обид за покренување иницијатива за изградба на ваков објект, која била повлечена по реакција на опозицијата.
„Веќе еден месец предупредуваме што прави Владата на Мицкоски. Ненародната влада не може да обезбеди чиста вода за граѓаните, во над 50 населени места, увезува скапа струја ама по секоја цена сака да ја жртвува и водата и струјата за профити. Во Пехчево на мала врата денеска се обидоа да протнат изградба на дата центар. Работат ‘под радарот’, како што кажаа и јавно. Под притисок на СДСМ, на советниците на СДСМ и на јавноста точката се повлече од дневен ред. Но тоа не значи дека власта се откажала од идејата“, истакна Филипче.
Лидерот на опозицијата тврди дека ваквите проекти ќе резултираат со директни последици по животниот стандард и снабдувањето на граѓаните.
„Мицкоски и ВМРО-ОКГ сакаат водата и струјата на граѓаните да ги продадат и да ги стават во функција на странски дата центри за сопствени тендерски профити. Да се богатат блиските до Мицкоски и ВМРО – ОКГ на штета на граѓаните. На крајот кој ќе ја плати таа струја? Граѓаните преку повисоки сметки. Кој ќе нема вода? Граѓаните. Каде ќе оди затоплената вода? Никој не кажува“, додаде тој.
Филипче упати апел до сите советници во општинските совети и до граѓаните за заедничка акција за да се спречи реализацијата на овие планови.
„СДСМ е прва која јасно се спротивстави на ставањето на водата и електричната енергија на граѓаните под ризик заради бизнис интересите на власта. Грабежот мора да се прекине додека не е доцна, да се спаси водата и струјата. Ги повикуваме сите советници во Советите ширум државата да се обединат и да спречиме водата и струјата да падне во раце на профитери на грбот на народот. Мораме да го запреме ова зло што ни се подготвува. Можеме само сите заедно. Да покажеме дека во вакви моменти можеме да бидеме сложни. Кога веќе ги немаме механизмите на власта, можеме да имаме граѓански отпор – отпор кон оваа криминална власт. Ако денес не го направиме тоа, утре ќе биде доцна. Ги повикувам и сите граѓани. Мораме да ги запреме дата-центарите“, порача Филипче.