Екс министерот за земјоделство Љупчо Николовски е под сомнение за незаконска распределба на повеќе од 800.000 евра за поддршка на мали винарии. Според пријавата, станува бор за повик распишан во 2023 година преку кој биле исплатени над 50 милиони денари. Според пријавата, средствата биле исплаќани без законска основа и без надлежност за таква исплата.
По наредба на Јавен обвинител во изминатите денови во полицијата покрај Николовски биле повикани и двајца порано вработени во Министерството за земјоделство кои членувале во комисиите кои одлучувале за распределба на средствата.
До Министерството за земјоделство е испратено и барање за прибирање дополнителна документација. По комплетирање на материјалите, СВР Скопје треба да ги достави до Основното јавно обвинителство, кое потоа ќе одлучува за понатамошниот тек на постапката.
Поранешниот министер случајот го нарече монтажа.
„ Не станува збор за прекршување на Законот за јавни набавки, ниту за пријава од земјоделци. Станува збор за монтиран случај кој треба да го оттргне вниманието од вистинските прашања.
Криминалот не се покрива со монтирани случаи. Неспособноста не се крие со напади врз туѓите успеси.
На земјоделците, винарите и производителите кои ме контактираа овие денови, Ви благодарам. Вие знаете што направивме.“ – напиша Николовски на социјалните мрежи.