Министерот за економија и труд Бесар Дурмиши, на денешната седница за пратенички прашања во Собранието, истакна дека Владата спроведува континуирани мерки за заштита на животниот стандард и правата на работниците.
Дурмиши потенцираше дека инфлацијата сега се движи меѓу 4,5% и 4,9%, што е значително намалување во споредба со кризната 2022 година.
Министерот нагласи дека кај 55 основни производи растот на цените е минимален, а трговските маржи се намалуваат, што според него покажува дека трговците преземаат дел од товарот.
Во однос на идните чекори, Дурмиши најави нови таргетирани мерки. Се разгледува можноста за дополнително намалување на ДДВ за основните прехранбени производи и повторно ограничување на маржите.
Во делот на платите, министерот подвлече дека минималната плата не смее да се носи со политички одлуки без економска основа.
„Во изминатиот период платите се зголемија во повеќе сектори преку колективни договори, а само по основ на усогласување со трошоците за живот има раст од околу 12%. Дополнително, утврдена е јасна динамика за раст од по 7% во 2026, 2027 и 2028 година, што претставува вкупно зголемување од околу 21%“, истакна Дурмиши.
Тој додаде дека Владата преку Економскиот совет редовно се консултира со синдикатите и работодавачите.
„Ги дискутираме сите теми, и за стандардот на вработените и за животниот стандард на сите граѓани и за платите на работниците колку се добри и колку треба да се зголемат“, рече Дурмиши.
Министерот заклучи дека Владата води одговорна фискална политика насочена кон стабилен економски раст, а не кон популистички ветувања.