Владата подготвува нов бран на финансиска поддршка насочен кон преработувачката индустрија и домашното производство, кој ќе се реализира преку неколку јавни повици.
Покрај веќе отворениот повик за набавка на алати и машини, министерот Бесар Дурмиши информираше дека во наредниот период ќе бидат објавени уште два значајни јавни повици во рамки на Програмата за поддршка на преработувачката индустрија и општествена одговорност за 2026 година.
Првиот дополнителен повик има за цел да им овозможи на домашните капацитети полесен пристап до странските пазари.
„Првиот јавен повик се однесува на надоместување на дел од трошоците за воведување, имплементација и сертификација на стандарди во преработувачката индустрија, со вкупен буџет од 2 милиони денари. Ќе се кофинансираат 70 отсто од трошоците, до максимум 200 илјади денари по компанија. Со ова сакаме да им помогнеме на компаниите полесно да ги исполнат меѓународните стандарди, да се вклучат во глобалните синџири на добавувачи и да ја зголемат својата извозна конкурентност“, објасни министерот.
Втората најавена мерка ќе ги стимулира заедничките активности меѓу реалниот сектор и високообразовните институции во земјава.
За оваа намена се предвидени 5 милиони денари, а кофинансирањето ќе изнесува 70 отсто од трошоците, но не повеќе од 500 илјади денари по проект.
Според надлежните, токму овој чекор е пресуден за долгорочниот економски развој на државата во време на глобални промени.
„Токму поврзувањето на бизнис секторот со науката, истражувањето и иновациите е клучно за технолошки напредок, зелена и дигитална транзиција и создавање производи со поголема додадена вредност. Во време на сериозни глобални економски предизвици, наш приоритет е поддршка на домашното производство, знаењето, иновациите и конкурентноста на македонската економија“, истакна Дурмиши.
На крајот, министерот ги повика сите заинтересирани страни внимателно да ги следат условите, напоменувајќи дека сите детали, услови и потребни документи ќе бидат достапни на веб-страницата на Министерството за економија и труд.