Попова Шапка утрово била најстуденото место во земјава, каде во 10 часот биле измерени 4 степени Целзиусови, покажуваат податоците на Управата за хидрометеоролошки работи (УХМР).
Во Скопје во истиот термин температурата изнесувала 9 степени, додека во Битола биле измерени 14 степени.
Разликите во температурите се забележуваат и покрај променливото време во земјава.
Денеска времето ќе биде променливо облачно, со повремени сончеви периоди. Попладне и кон крајот на денот на повеќе места низ земјата се очекуваат врнежи од дожд.
По одделни котлини ќе има услови за појава на магла, а ќе дува слаб до умерен ветер од јужен правец.
Минималните температури ќе се движат од 4 до 10 степени, додека максималните ќе достигнат од 12 до 16 степени.
Во Скопје се очекува променливо облачно време со сончеви периоди, а попладне и во вечерните часови ќе има дожд. Температурата ќе се движи од утрински 6 до максимални 14 степени.

Во наредните денови продолжува периодот на променливо облачно време со повремени локални врнежи од дожд со различен интензитет.
Под влијание на јужно воздушно струење, од утре температурите постепено ќе растат и повторно ќе бидат над просекот за овој период од годината.
Ќе дува умерен до засилен ветер од јужен правец, кој од среда повремено ќе надминува 60 километри на час, особено во западните делови од земјата.

