По пауза, повторно се воспоставува директната авиолинија меѓу Скопје и Дубаи. Авиокомпанијата „Флајдубаи“ од 1 април 2027 година ќе ги обнови летовите до македонската метропола, со три летови неделно, секој понеделник, четврток и сабота.
Со враќањето на оваа линија, патниците повторно ќе имаат директна врска со Дубаи, но и можност да продолжат кон голем број меѓународни дестинации преку партнерството на „Флајдубаи“ со авиокомпанијата „Емирати“.
Од компанијата велат дека обновувањето на летовите до Скопје е дел од нивната стратегија за подобро поврзување на пазарите со ограничен број директни авиолинии до Дубаи.
Главниот извршен директор на „Флајдубаи“, Гаит Ал Гаит, истакнува дека повторното воспоставување на линијата ќе отвори дополнителни можности за туризам, трговија и културна размена.
Поголем избор и флексибилност при патувањето најавува и Џејхун Ефенди, виш потпретседател за комерцијални операции и е-трговија во компанијата. Според него, линијата ќе биде погодна за туристите, деловните патници, но и за македонската дијаспора во Австралија и Азија.
Благодарение на соработката со „Емирати“, патниците од Скопје ќе можат да продолжат кон дестинации како Шангај и Сингапур, додека преку мрежата на „Флајдубаи“ ќе им бидат достапни и Бангкок, Коломбо и Занзибар. Резервацијата ќе може да се направи со една карта, а багажот ќе се регистрира директно до крајната дестинација.
„Флајдубаи“ првпат ја воведе линијата Скопје – Дубаи во октомври 2012 година. Со нејзиното повторно активирање, авиокомпанијата повторно ќе биде дел од воздушниот сообраќај во Македонија.
Компанијата располага со флота од 99 авиони „Боинг 737“, а нејзината мрежа опфаќа повеќе од 120 дестинации во 57 земји.