Министерката за финансии, Гордана Димитриеска Кочоска, денеска на прес-конференција ја оцени аукцијата за 10-тата еврообврзница како исклучително успешна, истакнувајќи дека државата ги обезбедила меѓу најповолните каматни услови во регионот. Според неа, ова е јасен сигнал за довербата на меѓународните инвеститори во македонската економија.
Задолжувањето од една милијарда евра е поделено во две транши:
- Транша од 500 милиони евра (4 години): со каматна стапка од 3,875%.
- Транша од 500 милиони евра (8 години): со каматна стапка од 4,75%.
„Каматните маргини во однос на Еурибор се најтесни во изминатите две децении. Ова е најконкурентната цена на задолжување што државата ја постигнала досега“, истакна министерката. Таа додаде дека по повеќе од дваесет години, државата успеала да пласира осумгодишна еврообврзница, што е потврда за долгорочната стабилност.
Средствата се наменети за исплата на еврообврзницата од 2020 година (700 милиони евра), покривање на буџетскиот дефицит и развојни проекти.