Close Menu

    ДИК почнува со дистрибуција на гласачките ливчиња, во недела втор круг локални избори во 33 општини

    2 Mins Read

    Од печатницата „Киро Дандаро“ во Битола утрово започнува дистрибуцијата на 1.013.357 избирачки ливчиња наменети за вториот круг од Локалните избори 2025 година, информираат од Државната изборна комисија (ДИК). Вториот круг на гласање ќе се одржи в недела, 2 ноември, и ќе се бираат градоначалници во 32 општини и во Градот Скопје.

    Гласање пред изборниот ден Во сабота, 1 ноември, своето право на глас ќе можат да го остварат болните и изнемоштените лица, затворениците и лицата во домашен притвор чии пријави се прифатени од општинските изборни комисии.

    Изборите ќе ги следат вкупно 1.569 набљудувачи (904 домашни и 651 меѓународен), а акредитирани се и 14 странски новинари.

    Прегласување за Совет Истата недела, на 2 ноември, ќе се одржи и прегласување за членови на Совет на три избирачки места во општина Шуто Оризари, каде што теоретски може да се влијае врз изборот на советничките мандати.

    Клучни изборни трки во Скопје

    Во Градот Скопје, со 474.394 гласачи, трката е меѓу Орце Ѓорѓиевски (поддржан од ВМРО-ДПМНЕ и коалицијата), кој во првиот круг освои 91.663 гласови, и Амар Мециновиќ (Левица) со 30.665 гласови.

    Интересна битка се очекува и во Карпош, каде актуелниот градоначалник Стевче Јакимовски (8.761 глас) се соочува со Сотир Лукровски (ВМРО-ДПМНЕ), кој во првиот круг освои 10.284 гласови. Во Карпош право на глас имаат 56.856 избирачи.

    Во Аеродром во вториот круг влегуваат Дејан Митески (ВМРО-ДПМНЕ), со 16.357 гласови и Александар Трајановски (СДСМ) со 6.881 глас. Оваа општина има 68.772 гласачи.

    Општина Центар ќе избира меѓу Горан Герасимовски (СДСМ) со 8.535 гласови и Мирослав Лабудовиќ (ЗНАМ) со 5.707 гласови. Во Центар се запишани 44.109 гласачи.

    Втор круг ќе се одржи и во Шуто Оризари, каде што со 23.893 гласачи ќе се борат Курто Дудуш (Унија на Ромите) со 3.223 гласови и Ерџан Демир (ВМРО-ДПМНЕ) со 1.841 глас.

    Општини без цензус Нова изборна постапка за избор на градоначалници ќе започне во четирите општини каде што не беше постигнат цензус од минимум една третина излезеност – Гостивар, Врапчиште, Центар Жупа и Маврово.