Во последните 24 часа во земјава се регистрирани 31 пожар на отворен простор, од кои три сè уште се активни, четири се ставени под контрола, а 24 се целосно изгаснати, информира Центарот за управување со кризи.
Активни пожари има на подрачјето на општините Студеничани и Зелениково, кај селата Моране, Вртекица и Рамни Габер, со ширење кон Палиград и Вражале, каде гори мешана шума.
Пожар е активен и на подрачјето меѓу општините Гостивар и Македонски Брод, кај селото Трново, во правец кон селата Битово и Заград. Активен е и пожарот над селото Нежилово во општина Чашка.
Под контрола се ставени пожарите кај кумановското село Тајмиште, во општина Македонски Брод, на потегот меѓу резерватот „Јасен“ и селото Брезница, како и пожарите на градската депонија „Мелци“ во Кавадарци и на депонијата во Делчево.