Речиси целата територија на Македонија, со исклучок на повисоките делови на Шар Планина, се наоѓа во зона со висок метеоролошки индекс за опасност од пожари, покажаа најновите податоци на Македонскиот информациски систем за шумски пожари (МКФФИС).
Според информациите на МКФФИС, состојбата е евидентирана денеска во 12 часот и 45 минути.
Директорот на Центарот за управување со кризи (ЦУК), Мухамет Али, во пишана изјава предупреди на можните ризици на терен.
„Иако во моментов нема области со многу висок метеоролошки индекс за опасност од пожари, сепак постои ризик од појава на пожари на отворен простор, како и шумски пожари со висок интензитет, на целата територија на државата“, наведува директорот на ЦУК, Мухамет Али.
Надлежните апелираат на зголемена внимателност на граѓаните при престој на отворен простор со цел спречување на појава и ширење на огнена стихија.