Вкупно 25 пожари на отворен простор се регистрирани во земјава во изминатите 24 часа. Од нив, четири се сè уште активни, три се ставени под контрола, а 18 се целосно изгаснати, информираат од Центарот за управување со кризи (ЦУК).
Според информациите од ЦУК, активни пожари има на следниве локации:
- Општина Студеничани: Меѓу селата Моране, Вртекица и Рамни Габер, каде што гори мешана шума.
- Општина Македонски Брод: Кај Видуш, Драгов Дол и Локвица, каде што е зафатена ниска вегетација, нискостеблеста шума и грмушки.
- Општини Велес и Зелениково: Во атарот на селото С’лп, од каде што огнот се шири кон селата Карабуњиште, Добрино и Тисовица.
- Општини Јегуновце и Сарај: Кај селата Копанце и Туденце, каде што пожарот се проширува кон селото Бојане.
Под контрола се ставени пожарите кај селата Алданци, Норово, Борино и Житоше во општина Крушево, како и пожарот на депонијата во Кратово.